Gaji Numpang Lewat, Tabungan Kempes, Dompet Meringis!

 

Visualisasi Hasil Survei Bank Indonesia

Kagak ada angin, kagak ada hujan, Bank Indonesia (BI) baru aja ngeluarin angka survei yang bikin dada rada nyesek tapi pengen ketawa. Katanya nih, orang-orang zaman now pada makin jago belanja, tapi kagak jago nabung!

Porsi pendapatan orang buat konsumsi naik terus dari 72,7% di Juli 2026 sampe nembus 74,9% di September 2026. Lah, yang buat ditabung malah nyungsep dari 16,8% sisa 15,4% doang!

Aye baca data itu sambil nyedot kopi item rasanya pengen nepok jidat. Ini mah kagak usah pake survei BI ge udah berasa di lapangan. Tiap tanggal muda gaya udah kaya sultan Kemang—pagi-pagi ngopi cantik, makan siang nyari yang estetik, sore jajan boba, malem checkout keranjang oren. Lah pas masuk tanggal pertengahan, muke langsung berubah kaya krupuk kaleng kena aer: lemes, mlempem!

Gaji Cuma Numpang Sungkem

Istilah kata, gajian zaman sekarang tuh udah kaya tamunya Pak RT: datang cuma buat kulo nuwun, abis itu pamit.

Begitu transferan dapet hilal, kagak sampe lima menit langsung meluncur buat bayar ini-itu. Yang porsi cicilan emang keliatan turun dikit jadi 9,7%, tapi bukan lantaran utangnya udah pada lunas, melainkan duitnya emang udah abis keburu dipake makan ama jajan!

Emang sih, hidup di jaman scrolling tanpa batas ini racunnya banyak bener. Buka hape dikit, nemu baju lucu. Buka media sosial dikit, nemu tempat nongkrong yang Instagrammable. Kalo kagak melipir, katanya takut FOMO (takut dibilang kagak gaul). Padahal mah, ketimbang FOMO, yang bikin ngeri tuh FOMAL alias Fokus Nyari Pinjaman Ampe Lelah!

Ujung-ujungnya, pas ada keperluan mendadak—ban motor bocor dua-duanya atau gigi geraham minta dicabut—baru dah kelimpungan. Nyari tabungan di rekening, isinya tinggal nol koma sekian, alias cuma cukup buat beli gorengan dua biji.

Nasihat Bang Piyan: Pinter-pinter Pake Uang, Jauhin Pinjol!

Buset dah, rasanya kita kudu sadar sebelum dompet makin mangap kaya buaya kelaperan. Hidup mah kagak usah kebanyakan gengsi, Lu mau dipuji gaya ama temen-temen lu, tapi pas malem kagak bisa tidur gegara mikirin besok makan apa, kan konyol namanya!

Nih, catet baek-baek nasihat orang tua:

Bedain "Kebutuhan" ama "Keinginan": Makan nasi ama lauk itu kebutuhan, tapi nongkrong ngopi lima puluh ribu tiap sore cuma demi dapet photo aesthetic itu keinginan. Kalo gaji masih ngepas, tahan-tahan dah itu jempol biar kagak gampang checkout.

Nabung Di Awal, Bukan Sisa: Begitu gajian, sisihin langsung buat tabungan di depan (mau 5% atau 10% terserah), baru sisanya dipake buat makan ama bayar tagihan. Kalo nunggu sisa, ya pasti kagak bakal ada sisanya, orang jajannya kagak ada remnya!

HARAM Hukumnya Lari ke Pinjol (Pinjaman Online): Ini nih racun paling biadab di zaman sekarang! Bunga mencekik, sebar data, bikin idup kagak tenang. Kalo lagi kagak ada duit, ya udah prihatin dulu, makan tempe ama garam ge jadi. Kagak usah sok-sokan minjem di aplikasi pinjol demi nutupin gaya hidup atau nutupin utang lama. Nanti bukannya kelar, malah rumah lu disamperin debt collector mukanya kaya kramat!

Inget ya, sodara-sodara: Kagak ada orang miskin gegara hidup sederhana, tapi banyak orang melarat gegara maksain keliatan kaya. Yok, mumpung belum terlambat, rapetin lagi kantong, kencengin gesper, dan selametin sisa-sisa gaji kita!