Paylater: Promo Fomo Terus Melongo

 

Visualisasi AI Jerat Paylater

Cing, kaga usah heran kalau belakangan ni banyak anak muda nongkrong di cafe tapi mukanya asem kayak sayur basi. Bukan lantaran kopi pait doang, tapi gara-gara ngeliat notifikasi tagihan yang datengnye lebih rajin dari penagih arisan. Zaman sekarang, ape-ape serba gampang. Tinggal pencet "Beli Sekarang, Bayar Nanti", barang langsung dateng dianter abang kurir. Niatnye mah pengen ikut-ikutan tren alias fomo (fear of missing out) biar dibilang anak gaul. Eh, kaga nyadar, ujung-ujungnya malah bengong alias melongo sendirian pas tanggal tua.

Kalo dibedah secara ilmiah, kelakuan kite-kite ini sebenernye ade sangkut pautnye same mahluk halus ekonomi yang namanye Lipstick Effect. Di seantero dunia, ilmuwan bilang, pas dompet lagi krisis atau pale lagi puyeng akibat tekanan hidup, orang-orang tetep doyan belanja barang-barang kecil buat pelipur lara. Ibarat kate, kaga mampu beli rumah mewah, ya udahlah, beli lipstik mahal atau skincare seiprit asal hati seneng.

Nah, apesnye di Jakarta pade khususnye, fenomena lipstick effect ini dikawinin same setan paylater. Pengennye sih self-reward secuil, tapi gara-gara gampang ngutang, tau-tau tu belanjaan kecil beranak pinak jadi segunung. Data Otoritas Jasa Keuangan (OJK) aje nyatet, per Mei 2026 fasilitas paylater melonjak sampe 40,28 persen dengan nilai pembiayaan tembus Rp13,18 triliun, di mana 93,01 persennye alias sebagian besar dipake cuma buat belanja konsumtif belaka! Kurang sakti ape tu jari lu, sekali klik doang, tau-tau gaji abis buat bayar utang masi kinyis-kinyis.

Ujung-ujungnye? Ya begimane lagi, lu pade sendiri yang rasain. Gaji numpang lewat doang di rekening, baru juga mendarat tanggal satu, tau-tau udah pada pindah tangan ke aplikasi pinjaman. Mau gaya hidup ala selebgram, akhirnye malah idup ala gelandangan elit.

Makenye, cing, jangan pade kagum same fasilitas utang digital kalau lu belom siap mental jadi pasien UGD keuangan. Kalo emang pengen tobat dan kaga mau terus-terusan melongo pas akhir bulan, ade care-care mujarabnye nih:

Pertama, budayain "puasa gadget" buat kaga buka aplikasi belanja online pas lagi bete. Kalau pengen self-reward, pake duit cash yang udah disisihin di celengan ayam, bukan pake duit demit alias utang digital. Kedua, bikin pos anggaran yang jelas saban gajian. Utamakan kebutuhan perut dan masa depan, bukan kebutuhan gengsi buat pamer story IG. Ketiga, inget-inget pesen orang tua, "besar pasak daripada tiang, rumahnye bakal keanginan." Makanya, mulai hari ni, uninstal aplikasi paylater dari HP lu kalo emang iman lu masih tipis setipis kulit timun. Biar kate dibilang ketinggalan zaman, seenggaknya pale lu kaga cenat-cenut tiap tanggal tua menjelang!